1. Familie Herlin / Heerlien / Herlijn / Herlyn

SENTENCE DES ELUS D'ARTOIS DECLARANT NOBLES ET EXTRAITS DE NOBLE GENERATION ET LIGNEE MESSIRE PASQUIER DE GOSSON ET MARIE DE GOSSON - du 1er Juin 1585 - A tous ceulz quy ces présentes verront, les Esleuz sur le faict des Aydes ordinaires et extraordinaires accordeez ès pays et conté d'Arthois, Saint Pol, Guisnes, Boullenois, ressors et enclavements d'iceulz, Salut. Comme procès, se soit meu, instruict et conclud en droict pardevant Nous d'entre Me Pasquier GOSSON, licencié ès-loix, seigneur de Rumenville et damoiselle Marie GOSSON, damoiselle de Melcastel, demandeurs, d'une part; et le Procureur du Roy, nostre sire, en icelle Election, deffendeur, d'autre.Sur ce que lesdictz demandeurs disoient combien qu'ilz fussent nobles et extraictz de noble génération partant non sudmis au paiement du droict de nouvel acquest, pour les fiefz et seignoiries par eulz et leurs prédecesseurs acquis depuis quarante ans encha; que néantmoins les commissaires de sa Majesté les auroient naguères comprins ( comme autres plébéens ) au tax d'icelluy droict, qu'ils auroient esté contrainctz namptir nonobstant leur opposition, les renvoyant. Iceulz commissaires, pardevant nous comme Juges compectens pour y instruire leur procès, selon qu'ilz trouveroient convenir. Suyvant quoi auroient faict adjourné ledit Procureur du Roi au plaidz du noeufvièsme de juin mil cincq cens quattre vingtz et quatte. Auquel jour fut pour eulz conclud ad ce que par nostre sentence diffinitive ils fussent déclarez Nobles, yssus de nobles générations et lignée à effect de jouyr et user de tous droictz, franchises, privilèges et immunitez afférens à ladite noblesse, signament de l'exemption d'icelluy droict de nouvel acquest, faisant en cas de contredict demande de dépens. Sur quoy ledit Procureur auroit prins conclusion contraire, tendant à ce qu'ilz fussent déclairés non recepvables; que sy recepvables estoient, que non à tort l'avoient mis en cause aux fins par eulz prétendues, dont ilz seroient debaitez et condemptés es dépens par les moyens par chacun d'eulz verballement alléguez nonobstant quoy lesd. demandeurs auroient persistez pour réplicques en leurs fins et conclusions; de manières que pour la contrariété de leurs d. faictz; raisons et moyens leur fut ordonné respectivement les coucher par écript par forme d'Intendit communicatif et en servir par devers la Court, puis sur iceulz faire telle preuve et enqueste que bon leur sembleroit. Suyvant quoy, chacunes desd. parties auroit servy d'intendit à la Court; disans lesd. demandeurs par icelluy pour fondement de leur intention que par usance, observation et voix commune en ce pays d'Arthois, ceulz quy de tamps immémorial descendoient de seigneurs et gens fondez en dignitez de seignourie et justice successivement possédées et continues de degré en degré de si longtemps que n'estoit mémoire du contraire et qui estoient tenus et répertez yssus de quelque noble et anchienne rache et parentaige, telles personnes et leurs successeurs estoient communément tenuz réputez et comprins au nombre des Nobles et non point en nombre de Plébéens mécanicques et roturiers. Or, pour monstre qu'ile étoient descenduz de nobles prédescesseurs et affin de faire particulière déduction de la noble et anchienne famille de laquelle ils avoient prins et tiré leur origine, disoient qu'ils feroient apparoir que Jacqemart GOSSON et damoiselle Marguerite de NOEUFVILLE, sa femme, leurs trissayeulz, doiz y a sept à huit vingtz ans estoient seigneurs de Noeufville au-Cornet-lez-Saint Pol, faisans leur résidence en icelle ville au tamps de leur vielesse; de la conjonction desquelz fut procrée Hues GOSSON, quy, successivement après leur trépas fut seigneur dudit Noeufville; lequel print sa résidence au villaige d'Ambrines ( dont son père était natif ) . auquel lieu paravant son trépas se transporta à son mand. la loy Eschevinalle d'Avesnes-le-Comte pour récepvoir et passer son testament (qui estoit en date du vingtième jour d'avril mil quattre cens quattre vingtz et après Pacques.) Icelluy Hues fait partaige de ses fiefz, seignouries et héritages à ses enffans, assignant à Jehan, son fils aisné la dicte terre et seignourie de Noeufville au Cornet; à Anthoine GOSSON et autres enffans puisnez plusieurs fiefz, terres et héritages séans audict Ambrines, Sars et allenviron; à charge de renonchier au quint de la dicte terre et seignourie de Noeufville au prouffit d'icelluy Jehan leur frère aisné, pour conserver icelle entière au chef de sa famille comme il est péculier à gens de Noblesse.